究竟一层楼，对我哋嚟讲，系乜嘢？
“如果有层楼，我应该就有‘人生’了。”
“噩梦咯！”
“因为冇楼，我冇咗两个老婆。”
“我可能会离开生活咗廿几年嘅地方。”
“咪玩啦，买楼...系层楼‘买起我’啊！”
“意味住未来30年，我冇得 say no！”
究竟一层楼，意味住乜嘢？
为咗一层楼，要付出几多？
睇完之后，应该搵到答案。
「 以下内容，均为真实对话访谈
经授权，交由羊城网编辑整理 」
X哥
年龄：30岁
职业：普通工薪族
备注：旧年上车
爆：X哥，听闻你层楼旧年买嘎喔。
X哥：买？你就开心了买，蓄够首期咋！（番禺某楼盘，具体地址X哥要求保密。）
爆：首期几钱？
X哥：差唔多100万。
爆：哇！X哥百万富翁喔！！
X 哥：我屌你啊！百万富翁，依家咪同你一齐食快餐挨饭盒！
爆：咁又唔好咁讲，你话晒都系有楼一族...
X哥：系奴隶！
......
爆：话时话，我真系想问下你，成百万首期，你点蓄嘎？
X哥：我同我老婆3年前结婚，开始蓄钱，两个人一共蓄咗40万左右...
爆：仲争成半喔！
X哥：食老咯，有咩计啫，再蓄多三年啊？到时首期就两百万了！
爆：咁你老窦老母、外父外母一共畀咗五六十万？
X哥：佢哋边得嚟咁多钱啊，我老窦老母夹咗10万，外父外母夹咗10万，问埋两边亲戚左凑右凑，都仲争十几万，最后冇计，唯有借贵利。
爆：为咗层楼，你都几搏喔！
X哥：有乜计啫，xxxxxx（这句话X哥要求保密）
M哥
年龄：33岁
职业：无业
备注：旧年摆酒上电视的某村村民
爆：M哥，你条村上晒报纸，威尽广州啦 !千万富豪！
M哥：讲笑咩富豪，得几间烂鬼屋，有鬼用咩！
爆：哇，你铺话法，咁我啲冇楼嘅咪直头应该去跳楼？
M哥：唔系呢个意思，我啲屋得个睇咋，全部都宅基地，唔卖得，要卖都只可以村民之间卖，人哋个个都几层楼，仲有鬼人买我啲楼咩。
爆：我知，卖唔到，咪攞去租咯，地段咁好，实租到好价钱掛！
M哥：我哋原本都系咁谂，点知......（设涉及第三方问题，不便透露。）
爆：咁你有咩打算？
M哥：平租就平租啦，好过冇嘅。
J少
年龄：40岁
职业：金融精英
备注：月入20万（朋友的朋友）
友：J少，近排有边只股值得入手啊？带携下喔！
J少：买咩鬼股票啊，买楼好过啦。
友：哇，我依家都系小市民炒炒股，你忽然升呢（level）升到炒楼，J少，我哋啲小市民，点同你比啊。
J少：你讲呢啲...依家中国有咩行业好搵得过“买楼”？有咩投资回报高得过“买楼”？而且基本上系“零风险”喔！
友：睇嚟你手头上都唔少楼喔！
J少：同你识咗廿年，我唔会同你扮傻嘅。真系趁依家买楼，一定赚嘅！喺中国买楼唔会有意外噶！我依家喺XXX（广州某区）有4间屋，租咗三间出去，自己住一间，一个月供15万。但系过多几年，就算全家劈炮唔捞，我哋下半世都唔使愁！
友：如果我依家入楼市，你有咩好建议？
J少：听日！就听日带晒你成副身家，去XXX（某楼盘），订到几套就订几套，讲完！
友：......
师兄阿K
年龄：25岁
职业：程序员
备注：毕业两年
爆：师兄，你早两年毕业個时有冇绝望过啊？
阿K：何止绝望啊，有谂过自杀添！
爆：咁大镬？咁依家心态由又好咗咁多嘅？
阿k：依家都系好绝望啊，冇本钱，冇后台，份粮又得楼价嘅零头，不过好在，女朋友同我分咗手了，老窦老母过几年都有退休金，份退休金仲多过我份粮，压力小好多，等以后有机会事业有成，再考虑成家咯。
爆：吓？你同阿嫂散咗啊？几时嘅事啊？
阿K：差唔多半年了，唉。。佢25，我又25，我哋男人老狗就话等到啫，女仔呢个年纪，唔上唔落，佢父母又要求有车有楼，你明嘎啦。
爆：明嘅，咁，佢飞你啊？
阿K：又冇话飞唔飞嘅，我又冇车，又冇楼，连份好工都冇，凭咩畀信心人啊。
爆：师兄，节哀。
D伯
年龄：67岁
职业：退休
备注：退休老村长、包工头
D伯：世侄，听阿伯讲，依家就算借钱都好，快啲买层楼！
爆：点解啊？
D伯：话你知啦，我做咗三十几年包工头，赚咗大把钱。但系你知唔知啊，我早两年喺XXX（佛山某楼盘）订咗几套房，今年收楼，都未装修完，我就已经赚返我呢三十几年赚到嘅钱了。
爆：咁你有本钱吖嘛，我有钱我都买楼啦。
D伯：所以咪话就算借钱都要买咯，信我啦，实赚嘎！
爆：D伯，你就讲得简单啫，我都想啊，但系真系好难吖嘛。
D伯：屌，依家啲有钱佬边个唔系咁样赚钱啊？啱开始肯定难嘎，但系你谂清楚，你依家辛苦啲买层楼，过两三年，你就可以买两三层楼了喔！
爆：好，我谂谂啦。
D伯：戙高床板谂清楚啊！你仲咁后生，唔好打死一世工啊！
爆：......
表哥
年龄：33岁
职业：普通工薪族
备注：结婚6年，刚刚离婚
爆：表哥，好地地点解同表嫂离婚嘅？咁突然，唔系听到姑姐讲起都唔知。
表哥：唔好提了，头家都散埋了，老婆走咗，老窦老母都反埋面，依家真系单身寡佬，孤家寡人了...
爆：唔系啩，咁大镬？
表哥：都系自己冇用，冇计嘅。
爆：究竟发生咩事啊？
表哥：我一直都系同老窦老母住，我个女今年就读一年级了，本来间屋有学位嘅，唔使烦，但系我家姐同我姐夫话间厂要扩大，要资金，我老窦老母一向锡我家姐多啲，于是连间屋都卖咗，全部钱畀晒家姐...
爆：咁你哋依家住边啊？
表哥：住边有咩所谓啊，关键系个学位吖嘛，我个女依家点算啊？我去求我老窦老母，唔好卖间屋，佢哋又唔理我，我老婆顶唔顺，又觉得我冇用，于是就同我离婚了，个女都带走埋。
爆：唔使搞到咁啩，一啲弯都冇得转咩？
表哥：我知我老窦老母由细都锡我家姐多啲，但系今次佢哋咁绝情，连个孙女都唔顾，我心都凉埋。唉...
引用羊城网网友阿圆嘅一句话，作为本文嘅结尾。
“
“对于楼价，我哋星斗市民一直哇哇叫苦。众多调控政策出台之后，我们也深深体会到，越限，只会越贵！所以，限购嘅真正对象，只系我哋小市民。”
——羊城网网友阿圆
”
衷心希望，我哋都会拥有“一层楼”。
本文由羊城网原创，未经授权禁止转载。
你可能会想睇：
广州话5个字可以表达几多嘢？
广东人系咪冇乜时间观念？
粤语问答比赛下半场，你够唔够生鬼幽默？！
发表评论 取消回复